Ministria e mbrojtjes e Sllovakisë ka propozuar tërheqjen e 140 trupave nga Kosova, ku po shërbejnë në kuadër të forcave të NATO-s.
Zëdhënësi i ministrisë së mbrojtjes, Richard Sumeghy, tha sot se nëse propozimi miratohet nga qeveria dhe parlamenti, trupat do të mund të ktheheshin në shtëpi nga fundi i vitit.
Zëdhënësi tha se tërheqja e trupave nga Kosova do t’i lejonte Sllovakisë të dërgojë trupa shtesë në Afganistan, ku tani ndodhen 300 ushtarë sllovakë.
Aleanca e NATO-s ka 10 mijë paqeruajtës në Kosovë dhe ka bërë përgatitje për të pakësuar numrin e trupave ndërkohë që përmirësohet gjendja e sigurisë në vend.