Përfaqësuesja e lartë e Bashkimit Evropian për politikë të jashtme dhe çështjet e sigurisë, baronesha Catherine Ashton, pas vizitës në Tiranë qëndroi në Shkup, ku tha se perspektiva evropiane e Maqedonisë është e realizueshme, por për këtë nevojitet zbatimi i plotë i Marrëveshjes së Ohrit, vazhdimi i dialogut politik dhe i dialogut me mjetet e informimit që janë të një rëndësie thelbësore.
“Integrimi evropian i këtij vendi fillon nga shtëpia”, - tha zonja Ashton, duke lënë të kuptohet se BE po ndjek me vëmendje përpjekjet për realizimin e marrëveshjes së 1 marsit midis dy partive politike maqedonase dhe theksoi domosdoshmërinë për formimin e një komisioni anketues për të ndriçuar incidentet e dhunshme në Parlamentin e vendit më 24 dhjetor.
Baronesha Ashton, duke folur në një konferencë për mjetet e informimit, nënvizoi nevojën për marrëdhënie të mira ndërfqinjësore dhe zgjidhjen e shpejtë të çështjes së emrit të Maqedonisë.
“Nuk ekziston mënyrë tjetër për të shkuar përpara dhe më mirë është të veprohet më shpejtë se sa më vonë”, - tha ajo. Në njëfarë mënyre zyrtarja e lartë evropiane la të kuptohej se kjo është mënyra e vetme për afrimin e Maqedonisë drejt BE-së.
Zonja Ashton erdhi për herë të parë në Shkup, në cilësinë e përaqësues për politikë të jashtme dhe siguri si dhe Nënkryetare e Komisionit Evropian. Ajo i bëri komentet pas takimeve me kryeministrin Nikolla Gruevski, me presidentin Gjorgje Ivanov dhe me drejtuesit politikë Branko Cërvenkovski dhe Ali Ahmeti.
Zonja Ashton erdhi për herë të parë në Shkup, në cilësinë e përaqësues për politikë të jashtme dhe siguri si dhe Nënkryetare e Komisionit Evropian. Ajo i bëri komentet pas takimeve me kryeministrin Nikolla Gruevski, me presidentin Gjorgje Ivanov dhe me drejtuesit politikë Branko Cërvenkovski dhe Ali Ahmeti.