Lidhje

Vendimet e KQZ-së për listat e kandidatëve ankimohen në Kolegj Zgjedhor


Opozita në Tiranë ankimoi në Kolegjin Zgjedhor vendimet e KQZ-së për të pranuar listat e kandidatëve për deputetë, pasi sipas saj, u shkel afati ligjor i përcaktuar në Kodi Zgjedhor.

Partitë e opozitës nuk janë regjistruar si garuese në zgjedhjet e dekretuara të 18 qershorit.

Ato kërkojnë nga Kolegji Zgjedhor të shfuqizojë vendimet e KQZ-së mbi miratimin e listave të kandidatëve për deputetë në zgjedhjet parlamentare të 18 qershorit dhe t'i çregjistrojë ato.

Sipas opozitës, afati për dorëzimin e listave është data 28 prill dhe jo 29 prill, sepse ato duheshin paraqitur 50 ditë përpara datës së zgjedhjeve të 18 qershorit.

Kryetari i PD-së, Lulzim Basha, tha sot para protestuesve në tendën midis parlamentit dhe kryeministrisë çdo listë e dorëzuar në KQZ është e paligjshme, procesi është në kolaps ligjor.

Kjo është dita e 82 të protestës së opozitës, por nga ana tjetër kjo është dita e dytë e fushatës zgjedhore të Partisë Socialiste.

Opozita pritet të mbledhë një tjetër tubim në fundjavë me përkrahësit e saj nga gjithë vendi, ndërsa socialistët sapo kanë nisur fushatën e tyre dhe po zhvillojnë takime me zgjedhësit.

Partia Socialiste deklaroi se e priti opozitën për bisedime dhe marrëveshje në bisedime me presidentin Nishani dhe me ndërmjetësues ndërkombëtarë.

Drejtues të saj shprehën vendosmërinë që të shkojnë në zgjedhjet e 18 qershorit, që të vazhdojnë reformat ekonomike dhe sociale dhe mbi të gjitha do të kryejnë reformën në drejtësi.

Sipas tyre, PD nuk hyri në këto zgjedhje nga frika e ndarjes me gjyqtarët e korruptuar.

Nga ana tjetër Zyra për Institucione Demokratike dhe të Drejta Njerëzore e OSBE-së (ODIHR) hapi dje zyrtarisht misionin e vëzhgimit të zgjedhjeve parlamentare të 18 qershorit në Shqipëri.

Vëzhguesit e OSBE/ODIHR-it pohuan se vendimi për të garuar apo jo është vendim politik, por ata erdhën për të monitoruar zgjedhjet dhe jo për të bërë komente mbi zhvillimet politike.

Facebook Forum

XS
SM
MD
LG