Trupi i pa kokë i gjetur në Detin Baltik, është identifikuar të jetë i gazetares së zhdukur suedeze, Kim Wall, e cila besohet se ka vdekur kur një nëndetëse e ndërtuar në mënyrë artizanale, u fundos më herët gjatë këtij muaji, njofton policia daneze.
Wall, 30 vjeçe, u pa e gjallë për herë të fundit më 10 gusht në nëndetësen e shpikësit danez, Peter Madsen, e cila u përmbyt në bregun lindor të Danimarkës një ditë më pas. Madsen, i cili u arrestua nën akuzat paraprake për vrasje pa paramendim, mohon se ka të bëjë diçka me zhdukjen e Wall-it.
Trupi pa kokë u gjet në një plazh nga një qytetar i cili po udhëtonte me biçikletë të hënën në ishullin jugor të Kopenhagës, Amager, afër vendit ku besohej se kishte vdekur ajo. Policia tha të martën se krahët dhe këmbët ishin "prerë qëllimisht".
Hetuesi i policisë së Kopenhagës, Jens Moeller Jensen, u tha gazetarëve të mërkurën se testet e ADN-së konfirmuan se trupi është i gazetares Wall. Ai tha se trupit i ishte ngjitur një copë metali, "me gjasë me qëllim që ta bënte të zhytet".
Trupi "doli në breg pasi kishte qëndruar në det për një kohë", tha ai, derisa shtoi se policia gjeti shenja në trup të cilat tregojnë se dikush u përpoq të nxirrte ajrin nga trupi në mënyrë që të mos notonte. Gjaku i tharë u gjet në brendësi të nëndetëses që përputhej gjithashtu me Wall-in, tha ai.
"Më 12 gusht, ne siguruam një furçë flokësh dhe një furçë dhëmbësh (në Suedi) për të siguruar ADN-në e saj. Ne kemi gjetur gjithashtu gjak në nëndetëse dhe ka përputhshmëri", tha Moeller Jensen.
Shkaku i vdekjes së gazetares nuk është ende i njohur, tha policia, duke shtuar se është ende në kërkim të pjesës tjetër të trupit të saj.
Madsen, i cili mbetet në paraburgim në polici me dyshimin për vrasje pa paramendim, fillimisht i tha policisë se Wall kishte zbritur nga nëndetësja në një ishull të Kopenhagës pas disa orë udhëtimi dhe se ai nuk e dinte se çfarë i ndodhi asaj më pas. Më vonë ai u tha autoriteteve se "një aksident ndodhi në bord që çoi në vdekjen e saj" dhe ai "e varrosi" atë në det.
Wall, një gazetare e pavarur e lindur në Suedi, studioi në Universitetin e Sorbonës në Paris, në London School of Economics në Londër dhe në Universitetin Columbia në New York, ku mori një diplomë master në gazetari në vitin 2013.
Ajo ka jetuar në New York dhe në Pekin, tha familja e saj, dhe kishte shkruar për The New York Times, The Guardian, South China Morning Post dhe Vice Magazine.
Familja e saj i kishte thënë agjencisë së lajmeve, Associated Press,se ajo po punonte për një artikull lidhur me Madsenin.
Facebook Forum