Prokurorët në gjyqin ndaj ish presidentit egjiptian Mubarak thanë se do të kërkojnë dënimin me vdekje për të dhe për të paktën 5 zyrarë të lartë të sigurisë.
Zoti Mubarak përballet me një sërë akuzash për korrupsion dhe përfshirje në vdekjen e qindra protestuesve antiqeveritarë gjatë protestave të vitit të kaluar që e rrëzuan atë nga pushteti.
Ish udhëheqësi egjiptian thotë se është i pafajshëm. Nëse gjendet fajtor për përfshirje në vrasjet e protestuesve, ai përballet me dënimin me vdekje.
Kreu i grupit të prokurorëve tha sot gjatë seancës gjyqësore në Kajro se ishte përgjegjësia e zotit Mubarak që të ndërhynte e të ndalonte dhunën ndaj protestuesve gjatë trazirave të vitit të kaluar që e rrëzuan atë nga pushteti.
Mes të pandehurve të tjerë janë edhe dy djemtë e zotit Mubarak, ish Ministri i Brendshëm dhe oficerë të lartë të ushtrisë egjiptiane. Ata akuzohen për një sërë akuzash.