Rreth 20,000 fëmijë besohet se janë të bllokuar në Falluxha të Irakut, ku vazhdojnë luftimet e ashpra për kontrollin e këtij qyteti që u mor nga militantët e Shtetit Islamik më shumë se dy vjet më parë.
Që nga fillimi i operacionit ushtarak për rimarrjen e Falluxhës, "shumë pak familje kanë mundur të largohen; shumica e njerëzve janë grumbulluar në dy kampe, ndërsa të tjerët kanë kërkuar strehim tek të afërmit,” njofton Fondi i OKB-së për fëmijët.
Kjo agjenci paralajmëron gjithashtu se fëmijët përballen me rrezikun e rekrutimit të detyruar dhe ndarjes nga familjet.
Ekziston frika se mijëra civilë të bllokuar mund të përdoren si mburoja njerëzore nga Shteti Islamik.