Megjithëse votuesit në Francë i rikthehen votimeve të dielën për raundin e dytë të garës presidenciale, shumë njerëz në Paris dhe në pjesë të tjera të vendit thonë se ende nuk kanë bërë zgjedhjen e tyre, mes kandidatëve Marine Le Pen e së djathtës ekstreme dhe Emmanuel Macron i qendrës së djathtë. Korrespondentja e Zërit të Amerikës Mariama Diallo raporton mbi atmosferën e përgjithshme në vend.
Është dita e fundit e një fushate zgjedhore të trazuar e cila ka ngatërruar politikën e vendit.
Në rrugët e Parisit dhe gjetkë, votuesit ende shprehin me dilema për kandidatët.
“Unë nuk jam për asnjë kandidat ... kam idenë time – por do votoj pa qejf. Mendoj se shumë francezë do të votojnë pa qejf,” thotë një student.
Një luleshitëse pariziane pajtohet.
“Kemi një kandidate e cila është pak e çmendur dhe pak e frikshme; dhe tjetri, nuk jemi të sigurt nëse ai është për njerëzit e thjeshtë. Ai është më shumë për bankierët dhe për ato njerëz. E pohoj se jam shumë e frikësuar. Nuk e di se ç’do të ndodhë” thotë ajo.
As debati i fundit nuk ndihmoi.
“Ishte relativisht zhgënjyes. Fyen njëri-tjetrin dhe nuk sqaruan programet e tyre” thotë Dominique, një votues francez.
Kandidatja e ekstremit të djathtë, Marine Le Pen, thotë se media ka nënvlerësuar zemërimin e popullit dhe beson se fitorja është e arritshme.
“Media pretendon se nuk e dëgjon zemërimin shoqëror që ekziston në vend, i cili do të shprehet përmes votimeve të dielën për të sjellë ndryshim dhe për të ndërprerë pesë vitet e socialistëve në qeverisje, që në këto zgjedhje përfaqësohen nga zoti Macron” thotë zonja Le Pen.
Por Macron, i qendrës së djathtë, thotë se ai duhet të fitojë të dielën.
“Për rreth 10 ditë jemi angazhuar në këtë betejë, në betejën e raundit të dytë, i cili vë dy programe përballë njëri-tjetrit, - Frontin Kombëtar...jo, mos bëni “yyy”, po shkoni luftoni kundër tyre! Votoni kundër tyre!” tha ai.
Megjithëse Macron mori një përkrahje të rëndësishme me mbështetjen që shprehu për të ish-presidenti i Shteteve të Bashkuara, Barak Obama nuk ka garanci se ç’do të ndodhë, pasi në të dyja kahet politike gjakrat janë ndezur në prag të zgjedhjeve.
Facebook Forum