Grekët reaguan me zhgënjim sot lidhur me miratimin nga parlamenti të një reforme që parashikon shkurtime të punonjësve të sektorit publik. Ata thanë se do të donin që ministri gjerman i Financave Wolfgang Schaeuble, i cili po viziton Athinën, të ndryshonte qëndrimin e tij këmbëngulës për masat shtrënguese.
Koalicioni qeveritar i Greqisë, në orët e para të mëngjesit, arriti të sigurojë miratimin nga ana e parlamentit të një projekt-ligji që shkarkon punonjës të sektorit publik. Kjo reformë, e cila i hap rrugën marrjes së këstit të ardhshëm të fondit të shpëtimit, u miratua me 153 vota pro dhe 140 kundër, ndërkohë që mijëra njerëz protestuan jashtë portave të parlamentit me parulla kundër masave shtrënguese.
Votimi ishte prova më e rëndësishme për koalicionin dypartiak të kryeministrit Antonis Samaras, që prej humbjes së një aleati për shkak të mbylljes së papritur të rrjetit shtetëror të transmetimeve televizive muajin e kaluar, që e la atë me një shumicë prej vetëm pesë anëtarësh në parlamentin me 300 vende.
Projekt-ligji i jep 25 mijë punonjësve publikë tetë muaj kohë për të gjetur punësim tjetër, ose largim nga vendi aktual në fund të afatit. Debati në parlament mbi paketën e reformës shkaktoi një javë me mitingje, greva dhe marshime protestash pothuajse të përditshme.
"Mbi projekt-ligji ishte vendosur tashmë dhe ai do të ishte miratuar gjithsesi. Unë jam kundër shkurtimeve,'' tha inxhinierja 50-vjeçare Dimitra Kesafouri, gjatë rrugës për në punë.
"Është e papranueshme, ashtu si çdo gjë që ndodh në vendin tonë. E gjithë situata është shumë dëshpëruese,'' tha inxhinierja 43-vjeçare Katerina Boupa.
Ndërkohë që ministri gjerman i Financave Wolfgang Schaeuble ndodhet në Athinë, shumë grekë, për krizën ekonomike të vendit, fajësojnë atë dhe këmbënguljen e Gjermanisë ndaj masave shtrënguese. Demonstruesit thonë se nuk mund të përballen me shkurtime të tjera të shpenzimeve qeveritare apo me rritje të mëtejshme të taksave – një mesazh që qeveria e tyre do t’ia transmetojë ministrit Schaeuble, nismëtarit kryesor të Evropës për masat shtrënguese ekonomike.
Disa grekë në rrugët e Athinës, thanë se ministri gjerman i Financave duhet të mos i shohë më njerëzit si të ishin numra.
Kjo është vizita e parë e zotit Schaeuble në Athinë, që nga fillimi i krizës evropiane të borxhit, në fund të vitit 2009. Ai ka shkuar në Greqi për t’i ofruar vendit një fond prej 100 milionë eurosh për nxitjen e rritjes ekonomike. Papunësia në Greqi është gati 27 për qind, më shumë se dyfishi i mesatares së eurozonës prej 12,2 për qind.