Në Kosovë, Komisionari i Bashkimit Evropian për Politika të Fqinjësisë dhe Negociata për Zgjerim, Johannes Hahn u bëri thirrje partive politike, që të bashkëpunojnë në rrugën evropiane të vendit dhe të çojnë përpara reformat e nevojshme.
Ai i bëri këto komente gjatë qëndrimit në Kosovë, pak ditë pas publikimit të Raportit të Progresit të Komisionit Evropian për vendet e Ballkanit Perëndimor, ku u bëhet thirrje aktorëve politikë që të gjejnë rrugën për tejkalimin e bllokadës së zgjatur politike dhe të hapin rrugën për reformat në sundim të ligjit dhe ekonomi.