Një ekip inspektorësh bërthamorë të Kombeve të Bashkuara ndodhet në Iran me synimin për të zgjidhur një mosmarrëveshje rreth programit bërthamor të atij vendi.
Delegacioni i Agjencisë Ndërkombëtare Bërthamore të Energjisë Bërthamore mbërriti sot në Teheran dhe kryesohet nga krye-inspektori i kësaj agjencie, Herman Nackaerts. Ai tha se përparësia e tij kryesore është analizimi i "përmasave të mundshme ushtarake të programit bërthamor të Iranit".
Zoti Nackaert tha se ekipi i tij do të donte të shikonte "rezultate konkrete" gjatë bisedimeve dy ditëshme me zyrtarët iranianë, por ai paralajmëroi gjithashtu se përparimi mund të kërkojë kohë.
Inspektorët e OKB-së duan që Irani të japë shpjegime për përfundimet e një raporti i Agjencisë Ndërkombëtare të Energjisë Bërthamore, që citojnë të dhëna se Irani ka punuar për ndërtimin e një arme bërthamore. Irani thotë se raporti është i bazuar në falsifikime.
Vizita e inspektorëve të Agjencisë Ndërkombëtare të Energjisë Bërthamore pason komentet e komandantit të ushtrisë amerikane, gjeneralit Martin Dempsey, i cili tha se një sulm izraelit kundër qendrave bërthamore të Iranit do të ishte "i parakohshëm" sepse nuk është e qartë nëse Irani po prodhon një bombë bërthamore.
Izraeli thotë se ndërhyrja ushtarake mund të jetë e nevojshme për të parandaluar Iranin që të zotërojë armë bërthamore.