Një ish-ushtare izraelite thotë se nuk sheh ndonjë të keqe nga publikimi i fotografive të saj në Facebook me palestinezë të ndaluar, me pranga në duar dhe me sy të mbyllur. Në një intervistë që dha sot për radion e ushtrisë izraelite, Eden Abergil tha se publikimi i fotografive nuk ishte një deklaratë politike. Ish-ushtarja thotë se fotot ishin marrë për të kujtuar eksperiencën e saj në ushtri. Ajo tha se fotografitë ishin të vitit 2008, në një bazë ku merreshin shpesh në pyetje palestinezët që përpiqeshin të kalonin kufirin e Gazës, për të hyrë në Izrael. Eden Abergil i vendosi fotot në Facebook disa javë më parë, nën titullin "Ushtria, ditët më të mira të jetës sime". Në njërën nga fotot është ish-rezervistja, duke buzëqeshur pranë tre të burgosurve me sy të lidhur. Në një tjetër foto, ajo është e ulur pranë një të burgosuri, me kokën të përkulur drejt tij.