Ministria e Shëndetësisë në Gaza tha se më shumë se 360 palestinezë u plagosën të premten nga trupat izraelitë që përdorën armë zjarri dhe gaz lotsjellës për të penguar përpjekjet e shumta nga palestinezët për të kaluar kufirin.
Dhuna shpërtheu pasi mijëra palestinezë organizuan një protestë përgjatë kufirit, protesta e tretë javore e parashikuar të zgjasë deri në mes të muajit maj. Protestat kanë rezultuar me dhjetëra të vrarë dhe mijëra të plagosur.
Protestuesit u mblodhën në kampet me tenda disa qindra metra nga kufiri.
Ushtarët izraelitë qëlluan drejt tyre me armë e gaz lotsjellës kur grupe të vogla protestuesish iu afruan kufirit duke djegur flamuj izraelitë e goma si dhe gjuajtur me gurë.
Sipas ministrisë së Shëndetësisë së Gazës mes 363 protestuesve të plagosur, 59 ishin plagosur me armë zjarri. Në mesin e të plagosurve kishte dhjetë punonjës së shëndetësisë. Një prej tyre vdiq nga plagët e marra, duke e çuar numrin e përgjithshëm të vdekjeve në 34, njoftoi ministria.
Protestuesit kërkojnë t'i japet fund bllokadës dhjetëvjeçare si dhe kthimin e refugjatëve palestinezë në Izrael. Izraeli në mënyrë të përsëritur ka përjashtuar mundësinë e kthimit të tyre për shkak të shqetësimeve se mund të humbasë shumicën e saj me popullësi hebreje.
Disa grupe të të drejtave të njeriut thanë se hapja e zjarrit nga forcat izraelite është e paligjshme, pasi trupat potencialisht mund të përdorin forcën me pasojë vdekjen, kundër protestuesve të paarmatosur. Por zyrtarët izraelitë thanë se ushtria ka vënë nën shënjestër vetëm "nxitësit" kryesorë.
Facebook Forum