Jemen, largohet Presidenti Saleh, kryeqyteti në festë

Kryeqyteti i Jemenit, Sana'a, u përfshi sot nga festimet, pas lajmeve se Presidenti Ali Abdullah Saleh është larguar nga vendi.

Zoti Saleh u plagos në sulmin e së premtes me raketa kundër kompleksit presidencial. Ai dhe disa zyrtarë të nivelit të lartë u dërguan dje me avion në Arabinë Saudite për trajtim mjekësor. Nuk ka asnjë deklaratë zyrtare mbi gjendjen e tij, edhe pse sipas njoftimeve ai po operohet për plagët e marra.

Në Sana'a, njerëzit kërcenin dhe këndonin, duke shpallur "fitoren." Por pati edhe shprehje shqetësimi nëse zoti Saleh, i cili ka qenë në pushtet për 33 vjet me radhë, është larguar përfundimisht apo do të rikthehet në Jemen.

Sipas kushtetutës së Jemenit, funksionet e tij i merr Nënpresidenti Abd Rabbo Mansour Hadi, i cili është takuar me ambasadorin amerikan. Zoti Hadi ka patur takime edhe me komandantët ushtarakë, duke përfshirë disa anëtarë të familjes së zotit Saleh.