Lidhje

John Kelly, shefi i ri i kabinetit në Shtëpinë e Bardhë


Sekretari i Sigurisë Kombëtare, Gjenerali në pension i marinës amerikane John Kelly, nga e hëna do të shërbejë në një post të ri, atë të shefit të kabinetit në Shtëpinë e Bardhë.

Komandanti ushtarak ka shërbyer tri herë në luftën e Irakut, dhe analistët thonë se ai pritet të sjellë disiplinë ushtarake dhe rregull në Shtëpinë e Bardhë, pas tensioneve që u mësua publikisht që ekzistonin atje.

“Ai ka qenë ylli i administratës sime”, shkroi dje në Twitter Presidenti, kur njoftoi emërimin e zotit Kelly në postin e ri. Ai e quajti atë “një udhëheqës dhe amerikan i shkëlqyer”.

Si Sekretar i Sigurisë Kombëtare, zoti Kelly ka marrë rol drejtues në politikat më të debatuara të Presidentit, si urdhërat ekzekutivë për ndalimin e hyrjes në Shtetet e Bashkuara të refugjatëve dhe ndalimin e përkohshëm të vizitorëve nga disa vende me shumicë myslimane. Këto urdhëra janë pezulluar nga gjykatat e shtetev, në pritje për t’u rishikuar nga Gjykata e Lartë në vjeshtë.

Gjenerali Kelly sfidoi anëtarët e Kongresit në muajin prill, kur diskutohej qëndrimi agresiv i administratës ndaj zbatimit të ligjeve për imigracionin dhe kjo shihet si një tjetër arsye që e bën atë tërheqës për Presidentin. Ai u pati thënë ligjvënësve “ndryshoni ligjet, ose përndryshe pushoni”.

Megjithatë, zoti Kelly gëzon respektin e ligjvënësve të të dyja partive në saje të karrierës së tij të shquar si ushtarak.

Facebook Forum

XS
SM
MD
LG