Komisioni Juridik i Senatit amerikan miratoi kandidaturën e zonjës Elena Kagan si anëtare e Gjykatës së Lartë. Tani mbetet që kandidatura të hidhet në votë në të gjithë Senatin. Komisioni juridik votoi me 13 vota pro dhe 6 kundër. Emërimi i zonjës Kagan u miratua nga të gjithë anëtarët demokratë të Komisionit. Senatori i Karolinës së Jugut Lindsi Graham, ishte i vetmi republikani që votoi njëlloj si demokratët. Demokratët kanë 12 nga 19 vendet e komisionit juridik. Presidenti Obama e emëroi zonjën Kagan për t’i zënë vendin anëtarit të Gjykatës së Lartë John Paul Stevens, i cili doli në pension në qershor. I gjithë Senati do të zhvillojë një seancë votimi për zonjën Kagan dhe demokratët shpresojnë që ajo të konfirmohet para se Senati të fillojë pushimet në gusht.