Parlamenti i Kosovës, që duhej të mblidhej në orën 11 shtyu për orën 14 sipas kohës lokale mbledhjen për të përfunduar seancën konstituive e cila filloi më 3 gusht, por nuk u përmbyll meqë deputetët dështuan të zgjedhin udhëheqjen e parlamentit, që është hapi i parë drejt ngritjes së institucioneve të reja.
Mbledhja e paralajmëruar për sot pasoi kërkesën e koalicionit të Partisë Demokratike, Aleancës për Ardhmërinë e Kosovës, Nismës për Kosovën dhe Aleancës Kosova e Re për vazhdimin e seancës.
Në kërkesën e këtij koalicioni drejtuar kryesuesit të parlamentit, Adem Mikullovci që është deputeti më i vjetër, thuhet se "është krijuar shumica parlamentare për konstituimin e parlamentit dhe institucioneve të tjera.".
Kërkesa e tyre pasoi negocimin gjatë gjithë ditës ë mërkurë me përfaqësuesit e Listës serbe, të cilët ngulën këmbë që të kenë tri ministri përfshirë edhe atë të bujqësisë, që fillimisht ishte ndarë për Aleancën Kosova e Re të afaristit Behgjet Pacolli.
Por të enjten, deputetët e shumicës nuk u paraqitën në sallën e mbledhjeve në kohën e caktuar dhe kryesuesi caktoi mbledhjen e re për pasdite.
Të hënën ishte arritur një marrëveshje për bashkëqeverisje ndërmjet koalicionit PDK-AAK-Nisma dhe Aleancën Kosova e Re.
Marrëveshja u kritikua nga lëvizja Vetëvendosje dhe Lidhja Demokratike e Kosovës, të cilat thanë se një qeveri e tillë nuk do të mund të ketë jetë të gjatë dhe se e njëjta do të jetë e varur nga Beogradi.
Facebook Forum