Një senator amerikan me peshë parashikon se ka shumë të ngjarë që të dyshuar të tjerë terroristë të mos dalin para gjykatave civile amerikane.
Senatori i pavarur Joe Lieberman tha për Zërin e Amerikës se heqja e 279 nga 280 akuzat ndaj të ndaluarit të parë nga burgu i Guantanamos në gjykatën civile, është siç tha ai është shkatërrimtare për qasjen e administratës së presidentit Obama. Zoti Lieberman, i cili drejton Komitetin e Senatit për Sigurinë Kombëtare dhe Komitetin për Çështjet Qeveritare, po ashtu tha se vendimi do ta bënte thuajse të pamundur mbylljen e burgut të Guantanamos.
Një juri federale në Nju Jork e shpalli fajtor tanzanianin Ahmed Galani, vetëm për një nga akuzat që ka lidhje me një komplot për vendosjen e bombave në vitin 1998 në dy ambasada amerikane në Afrikë ku u vranë 224 njerëz përfshi 12 amerikanë.