Një gjykatës në Londër hodhi poshtë apelin dhe lejoi lirimin me kusht të themeluesit të faqes WikiLeaks, Xhulian Assanzh.
Gjykatësi Duncan Ouseley kundërshtoi argumentat e prokurorëve se Assanzh duhet të qëndronte në burg. Sot paradite Assanzh u kthye në gjykatë për të tretën herë në pritje të vendimit të autoriteteve britanike. Dhjetra gazetarë mbushën sallën e gjyqit dhe sheshin para Gjykatës së Lartë në Londër duke ndjekur ekipin e avokatëve, përkrahësit e Assanzhit dhe nënën e tij Kristin Assanzh.
Avokati i tij Mark Stephens tha se çështja ishte thjesht në duart e gjykatësit. Assanzh, i veshur me një kostum gri të errët qëndroi në bankën e të akuzuarve ndërsa gjykatësi Ouseley filloi të dëgjonte apelin e prokurorëve britanik.
Themeluesi i WikiLeaks ka qënë në burg në Britani që nga 7 dhjetori. Ai u dorëzua tek autoritetet britanike pas një urdhërarresti të lëshuar nga Suedia nën akuzat për ngacmim seksual.
Të martën, Assanzh u lirua me kusht përkundrejt një shume prej 316 mijë dollarësh, por prokurorët u munduan ta mbanin atë në burg derisa të zhvillohej një seancë për ekstradimin e tij në janar.