Mijëra pelegrinë dhe turistë në Betlehem për Krishtlindjet

Mijëra pelegrinë dhe turistë filluan të vijnë në Betlehem për të kaluar Krishtlindjet në qytetin i cili besohet të jetë vendlindja e Jezusit.

Festimet e Krishtlindjeve në qytetin e Bregut Perëndimor do të arrijnë kulmin në mesnatë me një meshë në Kishën e Lindjes së Krishtit.

Kleriku më i lartë katolik në Tokën e Shenjtë, Patriarku Fuad Twal, do të drejtojë meshën në kishën e ndërtuar në vendin ku mendohet se Maria lindi Jezusin.

Kryebashkiaku i Betlehemit thotë se kjo Krishtlindje bart një domethënie të veçantë për palestinezët ndërkohë që përpjekjet e tyre për krijimin e shtetit po përparojnë.

Sot paradite, vizitorët u mblodhën rreth një peme gjigante të Krishtlindjeve në Sheshin e Grazhdit, nën tingujt e një bande frymore.