Nënpresidenti amerikan Joe Biden thotë se Shtetet e Bashkuara janë të gatshme t’i japin menjëherë vizë disidentit kinez Chen Guangchen.
Në një intervistë për rrjetin televiziv NBC, nënpresidenti Biden tha se pret nga Kina që të përmbushë zotimin e saj për të lejuar disidentin Chen të vijë si bashkëpunëtor shkencor pranë Universitetit të New Yorkut. Ai tha se e ardhmja e disidentit të verbër është në Shtetet e Bashkuara.
Disidenti Chen, e shoqja dhe fëmijët e tyre janë aktualisht në një spital në Pekin ku ai po mjekohet për plagët që mori kur po përpiqej të dilte fshehurazi nga arresti shtëpiak 2 javë më parë.
Ministria e Jashtme e Kinës tha të premten se zoti Chen mund të kërkojë të largohet nga vendi për studime “ashtu si çdo qytetar tjetër kinez”.