Policia pakistaneze thotë se një shpërthim i fuqishëm vetëvrasës me bombë tronditi qytetin lindor të Lahores, duke vrarë të paktën 13 vetë e duke plagosur 70 të tjerë.
Zyrtarët e spitalit thonë se mes të vrarëve ishin një grua dhe një fëmijë. Shpërthimi në mëngjes, kur trafiku ishte i ngarkuar, rrëzoi një godinë dy-katëshe, ku kishte zyrat Agjencia Federale e hetimeve dhe dëmtoi disa ndërtesa aty pranë. Autoritetet llogarisin se në sulm u përdor deri në 600 kilogramë eksploziv.
Talebanët në Pakistan morën përgjegjësinë për sulmin kundër zyrave të policisë hetimore. Zëdhënësi i Talebanëve, Azam Tariq tha se sulmi u krye në hakmarrje të sulmeve amerikane me avionë pa pilotë, si dhe të operacioneve ushtarake pakistaneze në zonat fisnore afër kufirit me Afganistanin.
Ndërkohë, zyrtarë pakistanezë të zbulimit thanë se 5 persona u vranë sot nga sulme të dyshuara amerikane me avionë pa pilotë në rajonin e Vaziristanit verior.