Zëvendësministri i jashtëm i Kosovës, Petrit Selimi vlerësoi sot marrëveshjet e arritura mes Kosovës dhe Serbisë për çështjet e telekomit dhe energjisë. Ai tha në një intervistë për Zërin e Amerikës se marrëveshja për energjinë realizon një treg unik në Kosovë. Ai gjithashtu tha se që nga viti 2015 Kosova do të ketë prefiksin e vet kombëtar. Zoti Selimi tha se kanë mbetur vetëm disa probleme teknike lidhur me zgjedhjet lokale në Veri të Kosovës dhe theksoi rëndësinë e pjesëmarrjes së qytetarëve atje në votime. Ai tha se vështirësitë i atribuohen edhe forcave që kanë përfituar nga gjendja në Veri.
