Sot ka patur rritje në tregun aksioneve në Shtetet e Bashkuara dhe atë evropian, ndërkohë që tregjet aziatike përfunduan në territor pozitiv dhe negativ.
Tregjet amerikane janë inkurajuar sot edhe nga një raport i publikuar nga Departamenti i Tregtisë, që thotë se në muajin korrik në Shtetet e Bashkuara janë shtuar shitjet me pakicë, të cilat një janë një barometër i rëndësishëm në përcaktimin e gjendjes së ekonomisë amerikane.
Sipas raportit, konsumatorët amerikanë kanë shpenzuar gjatë korrikut më tepër se në 4 mujat e mëparshëm për blerjen e makinave, pajisjeve shtëpiake dhe benzinën, duke i dhënë kështu një shtytje pozitive shitjeve me pakicë. Ato shënuan një rritje prej 0,5 për qind nga muaji qershor.
Shpenzimet e konsumatorëve përbëjnë 70 për qind të ekonomisë amerikane, dhe kjo është arsyeja përse ato ndiqen me shumë kujdes për të përcaktuar gjendjen e ekonomisë. Papunësia e lartë dhe çmimet e rritura të benzinës e ngadalësuan rritjen ekonomike në Shtetet e Bashkuara në fillim të vitit.
Kohët e fundit çmimi i bezinës ka rënë paksa, duke ndikuar pozitivisht tek kursimet e konsumatorëve. Megjithatë, shumë investitorë janë të shqetësuar nga luhatjet në tregjet e aksioneve, si dhe nga ulja e nivelit të kreditimit për ekonominë amerikane nga kompania S&P javën e kaluar.
Në një tjetër njoftim sot, besimi i konsumatorëve ka shënuar rënien më të madhe në 31 vjet. Konsumatorët amerikanë janë të shqetësuar për papunësinë e lartë, humbjet në tregjet e aksioneve dhe porbleme të tjera ekonomike që po kalon vendi.