Sekretarja amerikane e Shtetit Hillary Klinton po e vazhdon turneun e saj në Gjirin Persik me një vizitë në Katar, ku ka në plan të diskutojë çështjet rajonale me ministrat e jashtëm të Këshillit për Bashkëpunim të Gjirit Persik.
Më herët gjatë ditës së sotme, sekretarja Klinton u takua me Sulltanin Kabu të Omanit në kryeqytetin e vendit, Muskat, për të nderuar 40 vjetorin e ardhjes së tij në pushtet.
Dje Sekretarja e Shtetit vizitoi Jemenin, ku u takua me presidentin Ali Abdullah Saleh dhe përsëriti se Shtetet e Bashkuara janë të angazhuara të punojnë së bashku me autoritetet në Sana për të luftuar terrorizmin.
Sekretarja Klinton është sekretarja e parë e Shtetit që ka vizituar atë vend në 20 vjet.
Gjatë një konference të përbashkët shtypi me zotin Saleh, zonja Klinton tha se Shtetet e Bashkuara dhe Jemeni përballen me një kërcënim të përbashkët që vjen nga Al-Kaida dhe militantë tjerë. Ajo tha gjithashtu se Shtetet e Bashkuara janë të angazhuara t’i japin ndihmë ekonomike Jemenit.