Një veprim i përhapur në mediat sociale ka përfshirë gjithë Shtetet e Bashkuara duke tërhequr vëmendje dhe duke grumbulluar para për të luftuar sëmundjen vdekjeprurëse neurologjike, skleroza laterale amiotrofike, ose ALS. Vetëm këtu në SHBA, ka rreth 15 raste të reja me ALS të diagnostikuara çdo ditë dhe ajo është e njohur si sëmundja që i mori jetën lojtarit të famshëm amerikan të bejzbollit, Lou Gehrig, gati 80 vjet më parë.
Tani, ndoshta mund të keni dëgjuar për Sfidën e kovës me akull (Ice Bucket Challenge). Praktikisht, hedh ujë me akull mbi kokë. Por më parë, sfidon të tjerë të ndjekin të njëjtin shembull.
Kësaj sfide nuk i rezistoi dot as kolegu ynë në Nju Jork Julian Zyla, i cili e mori rrezikun e të ftohtit në sy pranë zyrës së Zërit të Amerikës në Manhattan, për një kauzë fisnike si ajo e luftës ndaj sëmundjes së sklerozës laterale amiotrofike.
Ky veprim i përhapur po mbledh para për kërkime shkencore rreth sëmundjes së rëndë,
"Tani për tani, ne veprojmë, në mbarë vendin – pra dy degët tona dhe organizata kombëtare – me rreth 15.6 milionë dollarë," thotë Barbara Newhouse, presidente e Shoqatës ALS (ALS Association).
Me ndihmën e kësaj fushate videosh virale, shoqata ka grumbulluar miliona dollarë vetëm brenda disa javëve, që do të thotë se mund të financojë më shumë hulumtime dhe mund të ndihmojë më shumë familje të prekura nga sëmundja.
Si familja Lewis.
"Babai im u diagnostikua me sëmundjen e Lou Gehrig-ut nëntorin e kaluar. Sëmundja filloi menjëherë të përshkonte organizmin e tij me një ritëm shumë të shpejtë, dhe trupi i tij u përkeqësua me shpejtësi, derisa më 27 prill, ai ndërroi jetë," thotë Matt Lewis.
Disa muaj më vonë, fushata e kovës me akull mori hov. Miqtë e tij e sfiduan, por Matt nuk ishte i sigurt nëse donte të merrte pjesë.
"Më kujtohet që javët e fundit kisha menduar se nuk i dija se si do të ndihesha në qoftë se më sfidonin. Më pas, tre miqtë e mi më emëruan për sfidën. Mendova se ishte koha e duhur për të reklamuar çdo gjë."
Kështu, ai pranoi Sfidën e kovës me akull, dhe menjëherë, katër orë pasi e publikoi, videoja e Matt Lewis kishte mbledhur më shumë se dy mijë dollarë.
Barbara Newhouse thotë se mediat sociale kanë ndryshuar mënyrën se si shoqatat jo-fitimprurëse kryejnë aktivitetin e tyre.
"Ajo që kemi parë me Sfidën e kovës me akull është ndoshta një pikë kthese për të gjithë ne në botën e mbledhjes së fondeve," thotë zonja Newhouse.
Nikki Usher, ndihmës profesore në Universitetin George Washington, është dakord:
"Nëse kërkon të kesh sukses në arenën e mbledhjes së fondeve dhe të arrish tek njerëzit që nuk ke qenë në gjendje të arrish më parë, duhet të synosh të shkosh tek ata me të cilët nuk ke lidhje të drejtpërdrejta. Dhe një nga mënyrat për ta bërë këtë është me anë të mediave sociale."
Zonja Newhouse thotë se sfida tani është të shpërndajë siç duhet miliona dollarët e grumbulluar deri tani. Një problem aspak i keq për një organizatë jo-fitimprurëse. Dhe kjo i jep shpresë njerëzve si Matt Lewis:
"Jam shumë i kënaqur me atë që po bëjnë njerëzit me këtë nismë. Është ngritur shumë ndërgjegjësim dhe shumë para, dhe shpresoj që do të vazhdojë të mbetet kaq e fuqishme në vazhdim."
Videot janë kudo duke përfshirë njerëz të famshëm që i bëjnë thirrje të gjithëve, nga miqtë e tyre deri tek presidenti Barack Obama. Ndërsa disa video janë dështime të plota, për shumicën, kjo është një mënyrë argëtuese për të rritur ndërgjegjësimin në lidhje me një sëmundje. Por për disa njerëz, kjo do të thotë se ka shpresë për të ardhmen dhe për një kurë.
Shoqata ALS thotë se deri tani ka mbledhur pothuajse 23 milionë dollarë.
