Kandidatët republikanë për president po zhvillojnë aktivitete të ngjeshura të fushatave të tyre elektorale, një ditë para së ashtuquajturës “Super e marta”, gjatë së cilës mbahen votime brenda Partisë Republikane në 10 shtete amerikane.
Gara në shtetin e Ohajos, e cila është në qendër të vëmendjes, duket mjaft e fortë midis ish Guvernatorit të Masaçusetsit Mitt Romney dhe ish senatorit Rick Santorum.
Një anketë e re e zhvilluar atje tregon se mbështetja ndaj tyre është tepër e përafërt dhe se nuk mund të parashikohet një fitues. Sondazhi i Universitetit Quinnipiac tregoi se zoti Romney kishte fituar më tepër mbështetës krahasuar me një muaj më parë, duke arritur në shifrën 34 për qind të personave që mund të votojnë, 3 për qind më tepër se zoti Santorum. Në muajin shkurt ish senatori Santorum kryesonte në Ohajo.
E ashtuquajtura “Super e marta” do të afrojë më tepër republikanët me zgjedhjen e tyre të njërit nga katër kandidatët republikanë për garën presidenciale, i cili do të ndeshet në nëntor me Presidentin Obama, kandidati i vetëm i Partisë Demokrate.