Të paktën 8 vetë u vranë dhe 11 u plagosën nga një sulm vetëvrasës me makinë-bombë pranë një stacioni policie në Bagdat. Sulmi ndodhi në distriktin verilindor al-Rashidya, të banuar kryesisht nga popullsia shi’ite.
Askush nuk e ka marrë përgjegjësinë, por sulmi i ngjante atyre të mëparshëm të kryer nga grupi Shteti Islamik në Irak. Dje në një sulm të ngjashëm, 12 vetë u vranë kur një person hodhi veten në erë në një treg të qytetit.
Kohët e fundit Shteti Islamik i ka shpeshtuar sulmet vetë-vrasëse në Irak. Sekretari amerikan i mbrojtjes Ash Carter i cili ishte në Irak para dy ditësh, premtoi të dërgojë rreth 500 forca të tjera amerikane për të ndihmuar në luftën kundër grupit terrorist.