Presidenti i Kosovës, Hashim Thaçi, tha sot se i ka dërguar katër letra Prokurorisë së Shtetit për të hetuar të gjitha krimet e rënda të ndodhura gjatë dhe pas luftës në Kosovë. Në një konferencë me gazetarë të hënën ai tha se pas kalimit të përgjegjësive nga institucionet ndërkombëtare te ato vendore, ka ardhur koha që të zbardhen të gjitha krimet e ndodhura.
Presidenti Thaçi tha se ka kërkuar nga Prokuroria e Shtetit që të hetojë dhe të zbardhë të gjitha masakrat dhe vrasjet gjatë dhe pas përfundimit të luftës në Kosovë, hetimin e përdhunimeve gjatë luftës dhe shkatërrimin e objekteve kulturore dhe fetare. Ai tha se disa nga këto krime janë trajtuar nga organet ndërkombëtare të drejtësisë por sipas tij asnjëherë nuk e kanë marr përgjigjen e merituar dhe se qytetarët dhe shoqëria në Kosovë kanë nevojë për drejtësi.
Presidenti Thaçi tha se zbardhja e këtyre krimeve do të forconte besimin e të gjithë qytetarëve dhe partnerëve ndërkombëtare në sistemin e drejtësisë në Kosovë.Kosova doli nga lufta me mbi 10 mijë të vrarë dhe mbi 5 mijë të zhdukur. Edhe më shumë se 17 vjet nga përfundimi i luftës shumë qytetarë kërkojnë zbardhjen e krimeve të ndodhura gjatë dhe pas luftës në Kosovë.