Aktivistë në Siri thonë se shpërthimet në qytetin veriperëndimor të Idbilit kanë vrarë të paktën 20 persona. Organizata me seli në Britani “Vëshguesi sirian për të Drejtat e Njeriut” thotë se shpërthimet patën si objektiv ndërtesat e ushtrisë dhe të forcave ajrore.
Agjencia shtetërore e lajmeve SANA tha se në dy nga shpërthimet u vranë të paktën 9 vetë dhe rreth 100 të tjerë u plagosën, duke fajësuar “terroristët” për sulmet. Ndërkohë, po kjo agjenci njoftoi se persona të armatosur qëlluan me granada Bankën Qendrore, duke e dëmtuar ndërtesën në kryeqytetin e vendit, Damask, por pa shkaktuar viktima.
Sulmet e sotme ndodhin vetëm disa orë pasi i dërguari i misionit të vëzhguesve të OKB-së në Siri i bëri thirrje trupave të Presidentit Bashar al Assad dhe opozitës t’i ndalin luftimet, në mënyrë që të mund të rezistojë armëpushimi i arritur përmes marrëveshjes së 12 prillit.