Departamenti amerikan i Mbrojtjes po përgatitet të përballojë nxjerrjen e 400 mijë dokumenteve sekrete të ushtrisë amerikane në faqen e internetit WikiLeaks.
Zëdhënës të Pentagonit thonë se po përgatiten për t’iu përgjegjur kësaj situate që ka të bëjë me dokumente të zbulimit mbi luftën në Irak
Publikimi i këtyre dokumenteve pritet të tejkalojë së tepërmi nxjerrjen e informacionit nga 77 mijë dokumetet e botuara në korrik për Afganistanin, duke përfshirë edhe emrat e informatorëve afganë dhe hollësi të tjera nga raportet e zbulimit.
Në rastin e botimit të dokumenteve në korrik, zyrtarët reaguan ashpër, duke thënë se WikiLeaks mund t’i ketë duart të lyera me gjakun e ushtarëve amerikanë dhe civilëve në Afganistan.
Raportet e kohëve të fundit citojnë sekretarin e Mbrojtes, Robert Gejts të ketë thënë në një letër private se megjithë rrezikun që paraqiste nxjerrja e sekreteve për jetën e afganëve që ndihmojnë forcat e NATO-s, burimet dhe praktikat e Shteteve të Bashkuara nuk janë kompromentuar.
Në letrën që i dërgoi më 16 gusht Senatorit Karl Levin, kryetari i Komisionit të Senatit për Forcat e Armatosura, zoti Gejts thotë se zbulimi i sekreteve mund t’u shkaktojë dëm të madh interesave të Shteteve të Bashkuara.