Në Shqipëri, thellohet skandali i incineratorëve. Lëvizja Socialiste për Integrim pritet të dorëzojë tek Prokuroria e Posaçme prova shtesë lidhur me abuzimet që sipas saj, përmbajnë transaksione të shumta falso dhe kanë çuar në një evazion fiskal prej 189 milionë dollarësh. Presidenti i Këshillit Evropian ishte sot në Shkup në kuadër të përpjekjeve për të çelur bisedimet me Maqedoninë e Veriut, pasi vendi të miratojë formulën e kompromisit me Bullgarinë. Është ende e paqartë nëse bisedimet me BE-në, do të çelen para, ose pasi Maqedonia e Veriut të bëjë ndryshimet në Kushtetutë për njohjen e pakicës bullgare. Një delegacion i Korporatës amerikane Sfidat e Mijëvjeçarit, diskutoi të martën me autoritetet në Prishtinë mbi zbatimin e programit 202 milionë dollarësh të kësaj korporate për energjinë, i cili parashikon investime në infrastrukturën e energjisë.