Në Kosovë, Partia Demokratike u ka bërë thirrje partive politike opozitare për bashkëpunim dhe bisedime të ndërsjella për të gjetur një zgjidhje për krijimin e institucioneve të reja. Ata thanë se ndërtimi i institucioneve të vendit nuk është çështje e vetëm një partie politike, por është përgjegjësi e të gjithave. Por, udhëheqësit e bllokut opozitar thonë se ata paraqesin shumicën që mund të formojë institucionet dhe se nuk do të heqin dorë nga synimi për ta lënë Partinë Demokratike në opozitë. Edhe më shumë se tre muaj që nga mbajtja e zgjedhjeve të parakohshme parlamentare Kosova mbetet pa institucione, dhe gjykuar nga qëndrimet e partive politike, procesi i ngritjes së tyre vështirë se do të sjellë ndonjë zgjidhje.